Peiriannwr pren

Rwy’n gweithio i Houghtons. Mae’r gwaith rydyn ni’n ei wneud yn cynnwys gwneud dodrefn o safon uchel, gan gynnwys dodrefn ystafell wely ar gyfer gwestai, cownteri derbynfeydd ar gyfer ysbytai a chownteri bariau ar gyfer tafarnau. Rydyn ni newydd ddechrau gweithio i Centre Parcs hefyd.

Pam wnaethoch chi ddewis eich rôl a sut wnaethoch chi ddechrau yn y rôl?

Dechreuais fel labrwr i Houghtons ac wedyn fe wnaethon nhw gynnig prentisiaeth Peiriannau Pren i mi.

Beth ydych chi’n ei hoffi am eich rôl?

Rydw i wir yn mwynhau’r amrywiaeth yn fy ngwaith, mae pob diwrnod yn wahanol. Er enghraifft, ar hyn o bryd rydw i’n torri llawer o baneli a deunyddiau dalennog ar gyfer dodrefn ystafell wely i westy yn yr Alban. Yfory, byddaf yn gorffen yr ymylon ar ddodrefn i wneud iddynt edrych yn dda, gan ddefnyddio peiriant o’r enw’r Bandiwr Ymylon. Ychydig wythnosau yn ôl, roeddwn yn gweithio gyda phren solet a’r peiriannau Trawstorri a’r Llif Rib i wneud cownter bar ar gyfer tafarn. Rydw i hefyd yn hoffi gweld y cynnyrch gorffenedig ar ôl i mi fod yn gweithio arno, mae’n werth chweil.

Beth ydych chi’n ei wneud yn eich swydd o ddydd i ddydd?

Rwy’n gweithio mewn gweithdy ac yn defnyddio’r holl wahanol fathau o beiriannau i dorri, siapio a gorffen dodrefn ar gyfer ein cleientiaid/cwsmeriaid. Mae hyn yn cynnwys gweithio gyda’r canlynol:

• Peiriant Llif Drawst ar gyfer torri deunyddiau dalennog (dalen fawr o ddeunydd – MDF, bwrdd sglodion) i wneud gwahanol ddarnau o ddodrefn.
• Bandiwr Ymylon a pheiriant Trawstorri i dorri’r pren solat i’r hyd cywir
• Peiriant Llif Rib i dorri deunyddiau i’r lled cywir.
• Peiriant Plaen Pedwar Ochr i roi gorffeniad taclus i’r deunyddiau rwy’n gweithio gyda nhw.

Mae diogelwch yn bwysig iawn. Wrth weithio gyda pheiriannau, mae angen i chi wneud yn siŵr bod y gardiau (rhwystrau diogelwch) wedi’u gosod yn iawn fel eich bod yn gweithio’n ddiogel. Rydw i hefyd yn gwisgo menig, gogls, esgidiau â blaenau dur ac amddiffynwyr clustiau er mwyn bod yn ddiogel. Yn y gorffennol, roeddwn i’n arfer mynd ar y safle e.e. gwesty, ysbyty, bar a ffitio’r dodrefn, ond erbyn hyn rwy’n gweithio mwy yn y gweithdy.

Oes unrhyw beth nad ydych chi’n ei hoffi am eich rôl?

O bryd i’w gilydd, mae’n gallu bod yn ailadroddus os ydw i’n gweithio ar yr un peiriant am gyfnod hir.

Pa sgiliau sydd eu hangen arnoch yn eich rôl?

Mae angen y canlynol arnoch:

• Gwybodaeth dda am y Peiriannau – Mae angen i chi wybod sut mae’r holl beiriannau’n gweithio a sut i’w rheoli’n ddiogel.
• Sgiliau Mesur Da – Mae angen i chi wybod hefyd sut i fesur yn dda fel bod popeth yn cael ei dorri i’r maint cywir.
• Sgiliau cyfathrebu a gwrando – Mae angen i chi allu derbyn cyfarwyddiadau gan eich rheolwr a gallu eu dilyn. Bydd fy rheolwr yn rhoi rhestr torri i mi sy’n dweud wrthyf pa ddeunyddiau y mae angen i mi eu torri ac i ba faint, ac mae’n rhaid i mi ddilyn y rhestr o ddeunyddiau’n gywir. Mae angen i chi hefyd ofyn cwestiynau pan nad ydych yn siŵr.
• Darllen Lluniadau – Mae fy nghydweithwyr sy’n gweithio yn y swyddfa yn gwneud lluniadau o’r dodrefn rydyn ni’n eu creu gyda’r holl fesuriadau arnynt, weithiau mae’r lluniadau’n 3D. Rhaid i mi allu darllen a dilyn y lluniadau, gosod mesuriadau ar y peiriant fel bod y deunyddiau’n cael eu torri’n gywir i wneud y dodrefn.

Beth oedd eich cefndir cyn dechrau’r rôl hon?

Yn yr ysgol, arhosais ymlaen yn y 6ed Dosbarth ac astudio TG ac Astudiaethau Busnes. Yna, es i’r coleg i ddysgu a hyfforddi chwaraeon, ond doeddwn i ddim yn gallu dod o hyd i swydd yn y maes hwn a gwelais swydd labrwr gyda Houghtons, sy’n gwmni lleol ar garreg fy nrws yn Baildon yng Ngorllewin Swydd Efrog. Roedd fy ffrind yn arfer gweithio i Houghtons, ac mi wnaeth o eu hargymell nhw.

Beth ydych chi'n ymfalchïo ynddo fwyaf yn eich gyrfa?

Rwy’n falch iawn i mi ennill gwobr ‘Prentis y Flwyddyn’ 2013 yng Ngholeg Adeiladu Leeds. Cefais dlws a siec am £60. Rwy’n credu i mi ennill y wobr hon gan fy mod wedi gwneud yn dda yn fy arholiadau ac yn y gwaith ymarferol. Fe wnes i gyflawni fy Uwch Brentisiaeth Lefel 3 mewn Peiriannau Pren gyda CITB (gan fynychu Coleg Adeiladu Leeds) ac rydw i’n falch iawn o hynny hefyd. Pan ddechreuais, doeddwn i ddim yn gwybod llawer am beiriannau gwaith pren, ond rydw i wedi dysgu llawer ac wedi dod i’w deall yn y pen draw.

Ble rydych chi'n gweld chi eich hun ymhen 10 mlynedd?

Hoffwn symud ymlaen i’r swyddfa gan ddefnyddio CAD/CAM (meddalwedd a ddefnyddir i wneud lluniadau) i wneud y lluniadau ar gyfer y dodrefn rydyn ni’n eu creu.

Beth fyddech chi’n ei ddweud wrth rywun sy’n ystyried ymuno â’r diwydiant adeiladu?

Byddwn yn ei argymell. Mae’r diwydiant adeiladu ar i fyny ar hyn o bryd, felly byddwn i’n dweud, “Cer amdani!”