Gweithiwr tynnu asbestos

Beth ydych chi’n ei hoffi am eich swydd?

Mae pob safle yn wahanol, felly mae bob dydd yn her newydd lle rwyf yn dysgu rhywbeth newydd. Oherwydd natur y gwaith hwn, rwyf hefyd yn cael teithio o gwmpas nifer o safleoedd yn ystod yr wythnos, felly dydw i byth yn sownd mewn un lle drwy'r amser.

Sut beth yw eich diwrnod gwaith?

Ar ôl codi fy nghydweithwyr rydym yn mynd i'n depo lleol i lwytho'r cyfarpar a deunyddiau y bydd eu hangen ar gyfer ein gwaith y diwrnod hwnnw. Ar ôl eu llwytho a chael unrhyw anerchiadau blwch offer neu rannu gwybodaeth am ddiogelwch, byddwn ni'n mynd i'r safle.

Ar ôl i ni gyrraedd y safle, bydd y goruchwyliwr yn cynnal briff cyn-gwaith sy'n esbonio'r gwaith ac yn amlygu unrhyw risgiau penodol - a nodir yn ein cynllun gwaith ac asesiad risg.

Fel tîm, byddwn ni i gyd yn helpu i ddadlwytho ein cyfarpar arbenigol a dechrau adeiladu'r lloc ynysu asbestos yn ofalus gan ddilyn cyfarwyddiadau fy ngoruchwyliwr, a'r manylion yn y cynllun gwaith.

Unwaith y bydd wedi'i adeiladu, byddwn ni'n cynnal prawf mwg i sicrhau bod pob uniad wedi'i selio ac nad oes unrhyw dyllau o fewn y lloc. Ar ôl i hyn gael ei basio, rydym yn barod i gychwyn y gwaith tynnu.

Gan ddilyn gweithdrefnau cludiant y cwmni, rwy'n gwisgo fy mwgwd a fy ngorchuddwisg cyn mynd i mewn i'r lloc i dynnu'r asbestos. Mae angen tynnu'r holl ddeunyddiau trwy ddefnyddio dulliau rheoli llwch, chwistrellu tarth a gwagio cysgod. Amlygir y dulliau a ddefnyddir ar y cynllun gwaith, a thrwy ein hyfforddiant blynyddol. Ar ôl i'r deunydd gael ei dynnu, mae'n rhaid iddo gael ei roi mewn bag dwbl cyn ei roi mewn sgip asbestos cloadwy. Wedyn mae'n rhaid imi lanhau'r ardal waith gyfan yn ofalus er mwyn sicrhau bod yr asbestos wedi cael ei dynnu'n llwyr gan wneud yr ardal yn ddiogel i grefftau eraill ddod i mewn ar ôl i ni orffen.

Ar ôl i mi orffen mae fy ngoruchwyliwr yn gwirio fy ngwaith cyn i ddadansoddwr annibynnol hefyd wirio'r ardal a chynnal prawf aer cyn i ni dynnu'r lloc a dychwelyd yr ardal i'n cleient.

Pa sgiliau sydd eu hangen arnoch yn eich swydd?

Yn gyntaf, sgiliau cyfathrebu a gwrando da. Hefyd mae angen i chi fod yn fedrus ag offer, ond mae hyn yn dod â phrofiad. Hefyd mae'n rhaid i chi allu gweithio'n dda mewn tîm.

Rwyf wedi cwblhau Rhaglen Brentisiaeth Arbenigol (SAP) drwy'r Is-adran Rheoli a Lleihau Asbestos (ACAD). Mae'r hyfforddiant cefnogol wedi golygu bod fy nghwmni wedi gallu fy anfon i ar bob math o dasgau. Yn gynharach eleni, cefais fy symud o'r gwaith tai cymdeithasol roeddwn i wedi bod yn ei wneud yn Wrecsam i waith mewn prifysgol, gan fod hyn yn golygu mynd i mewn i le cyfyng. Roedd hyn yn bosibl oherwydd fy mod i wedi derbyn hyfforddiant lleoedd cyfyngedig gan Mines Rescue drwy'r cynllun prentisiaeth.

Mae'r hyfforddiant PASMA a gweithio mewn mannau uchel yn golygu fy mod i'n deall y risgiau a'r rheolaethau diogelwch wrth weithio ar y gwaith tynnu soffitiau rydym yn ei wneud i'r cyngor lleol.

Yn ystod fy mhrentisiaeth, sicrhaodd KAEFER fy mod yn cael cyfle i weld pob agwedd ar ein cwmni a sut roedd y gwaith yn cael ei drefnu. Mae'r hyfforddiant i ddangos yr hyn sy'n digwydd yn y swyddfa cyn i ni fynd ar y safle wedi bod yn brofiad gwych.  Hefyd cefais gyfle i dreulio ychydig wythnosau yn cysgodi fy rheolwr, a roddodd cipolwg da iawn i mi ar y rôl.

Yn anad dim, y cymorth a'r anogaeth a gefais gan yr hogiau yn ACAD sydd wedi fy helpu i mewn gwirionedd, yn arbennig yn y cyfnodau cynharach, pryd cefais awgrymiadau gwych i'w defnyddio ar y safle.  Mae hefyd yn golygu y gallaf siarad â thrigolion ar y gwaith tai cymdeithasol ac esbonio beth rydyn ni'n ei wneud.  Mae asbestos yn dychryn llawer o bobl felly mae'n braf gallu tawelu eu meddyliau.

Beth oedd eich cefndir cyn dechrau’r rôl hon?

Roeddwn i wedi cael nifer o swyddi, ond dim byd yr oeddwn i'n ei wir fwynhau. Yna cefais y cyfle â KAEFER yn 2014 a dydw i ddim wedi edrych yn ôl.

Beth ydych chi'n ymfalchïo ynddo fwyaf yn eich gyrfa?

Yn bendant ennill y wobr Prentis y Flwyddyn ACAD gyntaf erioed yn 2016. Rwyf hefyd yn falch o sut mae fy sgiliau wedi datblygu. Rwy'n llawer mwy abl na chyn i mi ddechrau ar y Rhaglen Brentisiaeth Arbenigol.

Ble rydych chi'n gweld chi eich hun ymhen 10 mlynedd?

Hoffwn fod yn oruchwyliwr o leiaf, ond gobeithio y bydda i'n rheolwr erbyn hynny.

Beth yw eich cyngor i unrhyw un sy'n meddwl am yrfa yn y diwydiant adeiladu?

Cadwch eich llygaid a'ch clustiau ar agor i ddysgu gan eraill, ond uwchben popeth, peidiwch â bod ofn gofyn.