Cynghorydd trawsgludo

Sut i fod yn gynghorydd trawsgludo

Mae sawl ffordd o ddod yn gynghorydd trawsgludo. Gallwch ennill y cymwysterau sydd eu hangen arnoch drwy gwblhau cwrs hyfforddi, prentisiaeth, neu weithio’ch ffordd tuag at y rôl.

Dylech ymchwilio i’r llwybrau hyn i fod yn gynghorydd trawsgludo i weld pa un yw’r un iawn i chi. Er bod gofynion penodol o ran cymwysterau ar gyfer rhai o’r opsiynau hyn, mae gan lawer o gyflogwyr fwy o ddiddordeb mewn pobl sy’n frwdfrydig, sy’n barod i ddysgu ac sy’n gallu dilyn cyfarwyddiadau.

Efallai y bydd angen cerdyn Cynllun Ardystio Sgiliau Adeiladu (CSCS) arnoch i weithio ar safle adeiladu.

Coleg/darparwyr hyfforddiant

Gallech ddod yn gynghorydd trawsgludo drwy gwblhau cymhwyster proffesiynol drwy Gyngor y Trawsgludwyr Trwyddedig (CLC) fel Diploma Lefel 4 mewn Cyfraith ac Ymarfer Trawsgludo neu Ddiploma Lefel 6 mewn Cyfraith ac Ymarfer Trawsgludo.

Gallwch astudio hyd yn oed os nad ydych yn gweithio yn y proffesiwn cyfreithiol. Mae pob diploma yn cymryd oddeutu 18 - 24 mis i’w gwblhau, gan gynnwys profiad ymarferol. 

Os oes gennych radd mewn pwnc arall fel y gyfraith, Diploma i Raddedigion yn y Gyfraith (GDL) neu ddiploma Sefydliad Siartredig y Gweithredwyr Cyfreithiol (CILEx), efallai y gallwch gwblhau eich cymhwyster yn gynt. 

Prentisiaeth

Gallech ddilyn prentisiaeth uwch technegydd trawsgludo a symud ymlaen i wneud gradd-brentisiaeth trawsgludwr trwyddedig.

Bydd angen y canlynol arnoch chi:

Mae prentisiaethau ar gael i unrhyw un dros 16 oed. Fel prentis, bydd eich cwmni’n eich cyflogi’n llawn, a bydd disgwyl i chi weithio o leiaf 30 awr yr wythnos. Byddwch yn rhannu eich amser rhwng profiad yn y gwaith a’r coleg neu’r darparwr hyfforddiant.

• Canllawiau i brentisiaethau

Gwaith

Gallech wneud cais am swydd mewn swyddfa trawsgludo a gweithio eich ffordd i fyny drwy hyfforddi i ddod yn gynghorydd trawsgludo cofrestredig. 

Bydd angen 6 mis o brofiad ymarferol arnoch mewn practis profiant neu drawsgludo, mewn cwmni cyfreithiol neu mewn sefydliad sy’n cynnig gwasanaethau profiant i’r cyhoedd i wneud cais i gofrestru gyda Chyngor y Trawsgludwyr Trwyddedig. Gallech wedyn wneud Diploma Lefel 6 mewn Cyfraith ac Ymarfer Trawsgludo i gymhwyso’n llawn.

Profiad gwaith

Mae profiad gwaith yn hanfodol er mwyn cael gwaith yn y diwydiant adeiladu. Gallech chi gael hyn yn yr ysgol, neu drwy weithio ar benwythnosau ac yn ystod y gwyliau gyda chwmni neu berthynas sy’n gweithio fel trawsgludwr. Bydd darpar gyflogwyr bob amser yn falch o’ch gweld yn rhestru profiad gwaith ar eich CV.

• Dysgwch fwy am brofiad gwaith

Sgiliau

Dyma rai o’r sgiliau ychwanegol a allai fod o fudd i unrhyw un sy’n ystyried swydd fel cynghorydd trawsgludo:

• Dealltwriaeth o adeiladu
• Gweithio’n drylwyr a rhoi sylw i fanylion
• Sgiliau gwasanaethau cwsmeriaid
• Y gallu i weithio ar eich liwt eich hun
• amynedd a’r gallu i beidio â chynhyrfu mewn sefyllfaoedd llawn straen
• Sgiliau meddwl yn ddadansoddol a dealltwriaeth fathemategol
• Gwybodaeth gyfreithiol gan gynnwys gweithdrefnau’r llys a rheoliadau’r llywodraeth
• Gallu cyflawni tasgau sylfaenol ar gyfrifiadur neu ddyfais yn y llaw

Beth mae cynghorydd trawsgludo yn ei wneud?

Fel cynghorydd trawsgludo, byddwch yn gyfrifol am roi cyngor a gwybodaeth am eiddo i ddarpar brynwyr. Byddwch yn rheoli pob agwedd ar hyn, gan gynnwys rheoli cysylltiadau â chleientiaid, diweddaru dogfennau, neu ymdrin â materion ariannol.

Mae swydd cynghorydd trawsgludo yn cynnwys y dyletswyddau canlynol: 

• Cynghori cleientiaid ar brynu a gwerthu eiddo
• Ymchwilio i wybodaeth a rhannu hyn gydag eraill
• Gwirio a chadarnhau manylion perchnogaeth drwy chwiliadau a dulliau eraill
• Cadw cofnodion manwl, ar bapur ac ar system gyfrifiadurol
• Rhoi’r wybodaeth ddiweddaraf i’r cleient dros y ffôn, mewn negeseuon e-bost, drwy’r post ac mewn cyfarfodydd wyneb yn wyneb
• Cysylltu â gweithwyr proffesiynol eraill gan gynnwys benthycwyr a thimau cyfreithiol eraill
• Paratoi dogfennau contract angenrheidiol
• Delio ag agweddau ariannol y broses gwerthu neu brynu
• Cwblhau cyfnewid contractau
• Cadarnhau pwy sy’n berchen ar yr eiddo’n gyfreithiol a’r tir y mae arno.

Faint o gyflog allech chi ei gael fel cynghorydd trawsgludo?

Mae’r cyflog disgwyliedig i gynghorydd trawsgludo yn amrywio wrth i chi gael mwy o brofiad.

• Gall cynghorwyr trawsgludo sydd newydd gael eu hyfforddi ennill £17,000 - £25,000
• Gall cynghorwyr trawsgludo hyfforddedig gyda pheth brofiad ennill £25,000 - £40,000*
• Cynghorwyr trawsgludo hunangyflogedig sy’n gosod eu cyfraddau cyflog eu hunain.

Mae’r oriau a’r cyflog yn dibynnu ar y lleoliad, y cyflogwr ac unrhyw oramser y byddwch yn ei wneud.

* Mae cyflogau wedi’u casglu o sawl ffynhonnell o’r diwydiant

Edrychwch ar y swyddi diweddaraf ar gyfer cynghorwyr trawsgludo: 

• Indeed

Gan mai gwefannau allanol yw'r rhain, efallai y bydd nifer y swyddi gwag sy'n berthnasol i'r rôl o'ch dewis yn amrywio. Bydd cyfleoedd newydd yn cael eu cyhoeddi wrth iddynt godi.

Llwybr gyrfa a chamu ymlaen

Fel cynghorydd trawsgludo, gallech gael hyfforddiant ychwanegol i ddod yn gynghorydd cyfreithiol a chael eich cyflogi gan gwmnïau mawr i ddarparu cyngor mewn materion cyfreithiol. 

Gallech chi sefydlu practis preifat neu weithio fel ymgynghorydd hunangyflogedig a gosod eich cyflog eich hun.